Interi merr 3 oferta për Asllanin, klubi zikaltër merr vendimin e prerë

Kristjan Asllani nuk po gjen te Interi atë çfarë i ishte premtuar në merkato. Mesfushori shqiptar u vesh zikaltër për të qenë një alternativë e dytë e Brozoviçit.
Inzagi ka preferuar të tjerë edhe kur kroati ka qenë i dëmtuar. Minutat e dhëna nuk e kanë kënaqur 20-vjeçarin, i cili i ka kërkuar drejtuesve largimin në janar.
Ofertat për të nuk kanë munguar. “FcInterNeës.it” ka zbuluar se Specia, Empoli dhe Torino kanë trokitur në derën e Interit për shërbimet e mesfushorit shqiptar.
Megjithatë zikaltrit nuk janë tunduar dhe përgjigja ka qenë menjëherë “jo”. Interi e konsideron pjesë të rëndësishme të projektit të tij, por nga ana tjetër Inzagi vazhdon ta lërë në stol.
Trajneri italian nuk i dha asnjë minutë Asllanit në ndeshjen e mbrëmshme kundër Fiorentinës. Mbetet për t’u parë se si do të vazhdojë situata e tij në Milano.
Por me shumë mundësi, Asllani s’do lëvizë nga Interi pasi klubi zikaltër e sheh shqiptarin si një lojtar me shumë perspektivë për të ardhmen.





