Lajmi i mirë i vjen Shqipërisë dhe Rejës nga Portugalia, mbrojtësi kuqezi bën ndeshje të madhe ndaj Benfikës
Pas tre sezonesh me fanellën e PAOK-ut të Selanikut, ku luajti shumë pak, qendërmbrojtësi i Kombëtares Shqiptare, Enea Mihaj zgjidhi të transferohej në Portugali te Famalicao, ku e ka nisur aventurën në mënyrën më të mirë të mundshme.
Futbollisti 24-vjeçar ka luajtur si titullar në të gjitha ndeshjet që kur u transferua në Portugali dhe javën e fundit bëri një paraqitje për t’u admiruar edhe përballë një kundërshtari mjaft të njohur si Benfica.
Shifrat e publikuara në emisionin më të ri në SuperSport, “Analizë Kuqezi”, konfirmojnë se Mihaj ka fituar 13 nga 15 duelet ndaj Benficës dhe ka fituar të 6 duelet ajrore, falë edhe shtat-lartësisë së tij.
Qendërmbrojtësi pritet të luajë një rol të rëndësishëm në dy ndeshjet që Shqipëria do të luajë këtë muaj në Ligën e Kombeve, pasi në mungesë të Gjimshitit, Kumbullës e Dermakut, do t’i takojë pikërisht atij të zbresë në fushë.
Pikërisht forma e mirë e tij dhe minutazhi i plotë, janë një lajm i mirë për trajnerin Edi Reja, pasi dihet se Mihaj numëron 6 ndeshje me fanellën kuqezi dhe njihet mirë me grupin e lojtarëve.
Për Enea Mihaj ka pasur interes nga ana e Greqisë që të zgjidhte kombëtaren e tyre, por për asnjë moment djaloshi nuk e vuri në dyshim zgjedhjen e tij kuqezi. /Burimi: Superaport.al
